San Luis, Aurora, Philippines

New Year’s Party sa Diteki

sanluis — Thu, 05 Jan 2012 09:37:30 +0000

Sa tulong ng mga kawani ng Tanggapan ng Kagalingang Panlipunan at Pagpapaunlad o MSWDO, isang masayang pagdiriwang ng bagong taon ang inihandog ni Mayor Annabelle C. Tangson sa mga mamamayan ng Purok 1 ng Barangay Diteki kung saan naninirahan ang maraming katutubo na isa sa mga binibigyang pansin ng pamahalaang bayan ng San Luis, Aurora. Sa mensahe ni Mayor Tangson, sinabi niya na “Ang pagdiriwang nating ito ay isang pasasalamat sa bagong taon na idinagdag sa atin ng Panginoon. Ito’y isang pagsasaya upang malimutan ang mga hindi mabuting naganap sa taong nagdaan at ang magagandang karanasan ay itanim sa isip at idagdag sa masasayang pangyayari ngayong taong ito at sa susunod pang mga taon.” Kasama sa nagbigay ng kasiyahan si Vice Mayor Teddy A. Macatiag at ang kanyang mga kasamahan sa Sangguniang Bayan na sina Kon. Norminda S. Querijero, Kon. Corazon A. Teh at Kon. Percy B. Lopez na nagbigay din ng regalo sa mga taong dumalo. Naging masigla ang lahat sa paglahok sa mga palaro na inihanda ng MSWDO sa pangunguna ni Gng. Marissa Encarnado, ang Social Worker ng Barangay Diteki.Buong sigla rin na nagpakita ng kasiyahan ang punong barangay ng Diteki na si Kapitana Fe C. Rios kasama sina Konsehal Magno at Konsehal Olivar. Ang lahat na dumalo ay masayang nag-uwian taglay ang galak dahil sa mga regalong kanilang natanggap.

Municipal Children’s Report

sanluis — Wed, 28 Dec 2011 01:19:47 +0000

MUNICIPAL CHILDRENS REPORT 2011 (Click here to view)
“Gawin nating malusog at matatag ang ating mga kabataan sa pamamagitan ng tamang nutrisyon at edukasyon, upang makamit nila ang isang magandang bukas”. Iyan ang mga pangungusap na binitiwan ni Mayor Annabelle C. Tangson sa harapan ng mga opisyal ng bayan, mga kawani ng mga ahensya ng pamahalaan na kabilang at miyembro ng Municipal Council for the Protection of Childrens na kinabibilangan ng PNP, DILG,MHO, MPDC, MSWD, DepEd at ABC at mamamayan ng bayan ng San Luis, sa kanyang ulat sa bayan patungkol sa mga kabataan noong ika-27 ng Disyembre, 2011. Ang Municipal Children’s Report ay isinagawa upang mai-ulat sa bayan ang kasalukuyang sitwasyon at kalalagayan ng mga kabataan kasama ang mga programa at proyekto na inilalaan at ipinatutupad ng punong bayan para sa edukasyon at kalusugan para sa mga kabataan sa nakalipas na taong 2011. Ito ay sa tulong at pag-alalay ng mga kawani ng Pambayang Tanggapan ng Kagalingang Panlipunan at Pagpapaunlad o MSWDO ng bayang ito sa pangunguna ni Gng. Hiyasmin S. Mendoza at ng kanyang mga kawani. Ang programa ay naglalayong ipaalam sa mamamayan ang mga programang ipinapatupad ng pamahalaang bayan para sa mga kabataan at upang hikayatin ang lahat ng sektor at mamamayan na makipagtulungan upang maging matagumpay ang magagandang layunin ng pamahalaan.

Employee’s Christmas Party

sanluis — Wed, 21 Dec 2011 11:00:04 +0000

Upang madama ang tunay na diwa ng pasko, sama-samang nagdiwang ng paskuhan ang mga kawani ng pamahalaang bayan ng San Luis noong ika-20 ng Disyembre, 2011 sa tulong at pangunguna ni Mayor Annabelle C. Tangson. Ang kasiyahan ay ipinadama ng bawat kawani sa pamamagitan ng pagkikiisa sa mga palaro, sayawan, pagsasalu-salo at pagpapalitan ng mga aginaldo. Naging makulay ang gabi sa paghahangad ng lahat na makakuha ng mga regalo sa isinagawang raffle draw. Si Hilda Torres ng Barangay Nonong Sr. ang maswerteng nagwagi ng grand prize na isang netbook computer.Ang pagdiriwang ay pinamahalaan ng mga opisyales ng SLAMEA at naging maging masigla ang lahat sa pagsasayaw sa tugtog ng banda ng 48th Infantry Batallion.

Paskuhan ng Katatandaan

sanluis — Wed, 21 Dec 2011 09:48:54 +0000

Masayang ipinagdiwang ng katatandaan ang pagsalubong sa kapaskuhan. Ito ay sa pamamagitan ng sama-samang pagtitipon ng lahat ng grupo ng katatandaan buhat sa iba’t ibang barangay ng bayan ng San Luis. Ang pagdiriwang ay pinamahalaan ng Pambayang Tanggapan ng Kagalingang Panlipunan at Pagpapaunlad o MSWDO, ang punong tanggapan na umaalalay sa mga nakatatanda at naisakatuparan sa pamamagitan ng di matatawarang suporta at pagmamahal ni Mayor Annabelle C. Tangson sa mga nakatatanda sa bayan ng San Luis. Malugod na tinanggap ng mga matatanda ang pamaskong regalo at pera buhat sa punong bayan na lalong nagpasaya sa mga dumalo.

Day Care Children, Nagdiwang ng Pasko

sanluis — Fri, 16 Dec 2011 09:39:52 +0000

Masayang nagdiwang ng pasko ang mga batang mag-aaral sa iba’t ibang Day Care Center dito sa bayan ng San Luis, Aurora. Ang naturang pagdiriwang ay kinapalooban ng mga sayawan at kantahan na ipinakita ng mga batang mag-aaral na nakapagpasya sa lahat. Nadagdagan ang kasiyahan ng lahat nang dumalo sa pagtitipon si Mayor Annabelle C. Tangson na nagbigay sa kanila ng pamaskong regalo na siyang inaasam-asam ng mga bata tuwing magdiriwang ng pasko.